3 ліпеня ў г. Салігорску прайшлі мерапрыемствы, прысвечаныя Дню Незалежнасці Рэспублікі Беларусь, 74-й гадавіне вызвалення Беларусі ад нямецка-фашысцкіх захопнікаў.
Працягнулася свята на Цэнтральнай плошчы горада праграмай-ушанаваннем лепшых работнікаў арганізацый раёна, занесеных на Дошку гонару Салігорскага раёна па выніках 2017 года пад назвай «Салігоршчына — мая слава, надзея, гонар».
Прысутных з галоўным святам краіны павіншаваў старшыня Салігорскага раённага выканаўчага камітэта Алег Рыгоравіч Паскробка. Алег Рыгоравіч выказаў асаблівыя словы падзякі ветэранам вайны, пажадаў ім моцнага здароўя, даўгалецця і заклікаў маладое пакаленне прымнажаць здабыткі Радзімы, забяспечваючы тым самым яе свабоду і незалежнасць.
Пасля адбылося ўзнагароджанне лепшых работнікаў суб’ектаў гаспадарання нашага раёна, занесеных на Дошку гонару Салігорскага раёна па выніках дзейнасці ў 2017 годзе.
Усе яны былі адзначаны Ганаровымі граматамі старшыні Салігорскага райвыканкама, а таксама каштоўнымі падарункамі.
Выдатным падарункам для ўсіх прысутных стала выступленне Заслужанага калектыву Рэспублікі Беларусь «Купалінка» Белдзяржфілармоніі (мастацкі кіраўнік — заслужаная артыстка Рэспублікі Беларусь Алена Цялькова) і гала-канцэрт пераможцаў адкрытага гарадскога фестывалю мастацтва «Салігорск — гэта ты!» Пад назвай «Зямля, Дзе пачаўся твой лёс ». З першых музычных нумароў ўся плошча весела падпявала і апладзіравала вядомым выканаўцам Салігоршчыны.
Кропку ў гэтым канцэртным марафоне паставілі папулярныя беларускія выканаўцы Жанэт і Саша НЭМА.
Заключнымі акордамі свята, прысвечанага Дню Незалежнасці Рэспублікі Беларусь і 74-й гадавіне вызвалення нашай краіны ад нямецка-фашысцкіх захопнікаў, сталі грамадска-культурная акцыя «Спяваем гімн разам!» і відовішчны феерверк.
Пад рытмічны музычны акампанемент неба над Салігорскім асвяціўся рознакаляровымі агнямі.
Інфармацыйны аддзел Палаца культуры г. Салігорска.