Ў ДК г. Салігорска прайшла трагікамедыя «Вар’ятка

7 снежня ў Палацы культуры г. Салігорска у рамках рэспубліканскай акцыі «Майстры культуры — жанчынам Беларусі» прайшла трагікамедыя «Вар’ятка», якая стала падарункам у гонар 30-годдзя Беларускага саюза жанчын.

Вось што гаворыць пра спектакль рэжысёр Таццяна Траяновіч:

Новы спектакль РТБД «Вар’ятка» — гэта калі вельмі смешна, а потым «прыбівае» і не адпускае некалькі дзён. Гэта калі шукаеш сваё адлюстраванне ў іншым чалавеку, але кожнае новае люстэрка толькі разлятаецца на аскепкі. Гэта калі жыць у сучаснасці немагчыма, таму што мінулае яго цалкам зацьміла, а ў будучыню і глядзець страшна. Гэта калі «ненармальным» у нейкі момант можа аказацца кожны з нас.

Неверагодная атмасфера і ігра акцёраў не адпускалі ўвагу гледачоў да самага канца. Разам з акцёрамі гледачы перажывалі, кахали, суперажывалі, смяяліся і плакалі… На змену пацешным сітуацыям прыходзілі сумныя маналогі і дыялогі, ружовыя ілюзіі і мары разбураліся рэальнасцю, развейваліся прывіды мінулага, запальваліся і згасалі рамантычныя пачуцці… Па сутнасці, галоўныя героі на сцэне — адзінота і каханне.

Гучныя апладысменты і захопленыя крыкі «брава» доўга не адпускалі акцёраў са сцэны… Гэты спектакль не можа пакінуць кагосьці абыякавым. Вы будзеце глядзець яго з усмешкай на вуснах і слязамі на вачах, а эмоцыi яшчэ доўга вас не пакінуць.

Яна — Наталля Халадовіч.
Ён — Максім Шышко.